Ahabanza » Ubwiza » Kwiyitaho » Ibyo uzirinda gukora wita ku bwiza bwo mu maso

Ibyo uzirinda gukora wita ku bwiza bwo mu maso

Yanditswe kuwa 04-10-2016 Saa 00 : 07

Mu gihe ushaka ubwiza bwo mu maso hari amakosa amwe n’amwe ushobora gukora akaba yakwingiriza uruhu cyangwa se akakugiraho ingaruka nyinshi zitandukanye. Amwe muri ayo makosa usanga akorwa n’abantu benshi, rimwe na rimwe batanazi ko bigira ingaruka mbi.

Kurarana ibirungo wisize : Uruhu rwo mu maso ruba rukeneye kuruhuka no guhumeka igihe uryamye. Ni ingenzi rero kwibuka ko ugomba kwikuraho ibirungo byose wisize mbere yo kuryama, kugirango uruhu narwo ruze guhumeka neza. Ahanga mu byo kwita ku ruhu basanze ijoro rimwe umuntu arara atihanaguye ibirungo ringana n’iminsi 14 yo gusajisha uruhu.

Gukuba uruhu rwo mu maso cyane : Uruhu rwo mu maso ni uruhu rworoshye umuntu wese aba agomba kwitondera. Si byiza ko urukuba cyane mu gihe uri gukaraba kuko birutera kumagara bikaba byanakurura ibiheri byo mu maso.

Kureka uruhu rukuma cyane : Nyuma yo koga umaze kwihanagura wagakwiye guhita wisiga amavuta atuma uruhu rukomeza guhehera. Iyo urindiriye ko rwuma cyane ni ha handi wisiga amavuta ukabona atagufata usa n’urwaye umwera mu maso.

Kudakorera isuku ibikoresho by’ubwiza : Ibikoresho ukoresha wisiga bigomba kuba bifite isuku. Hari bamwe baheruka babigura ubundi bakajya babyisigisha birimo umwanda. Uwo mwanda iyo ugeze ku ruhu ushobora guha ingufu mikorobi zitera ibiheri no kuryaryata.

Kumena ibiheri byaje mu maso : Igihe warwaye igiheri kidasanzwe mu maso uba ugomba kukitondera kuko ushobora kukimena kikaba cyamumerera nabi kurushaho. Cyane cyane ibiheri byo ku zuru, ibyo ku mpande y’amaso, ku munwa, hafi y’umusaya n’ahandi biba bigomba kwitonderwa cyane.

Kurambana ibikoresho by’ubwiza bikamara igihe kirekire ; Ibikoresho by’ubwiza biba bifite igihe bigomba kurangirira. Icyo gihe kiramutse kigeze ukibifite usabwa kubijugunya ukagura ibishya. Ikindi kandi hari ubwo usanga ibikoresho bifite igihe bitagomba kurenza bikoreshwa hatitawe ku gihe cyanditseho ko bizarangirira.

Urugero podre ntiba igomba kurenza umwaka umwe, mascra ni amazi atatu, rouge a levres ni umwaka umwe, eponge wisigisha na gants ntibikwiye nabyo kurenza umwaka

Niba rero ushaka gukomeza kwita ku ruhu rwawe nta ngaruka mbi witeye, ibi byose tubonye n’ibindi bishobora kwiyongera ku rutonde, uba ugomba kubyirinda.

Gracieuse Uwadata

Ibitekerezo byanyu

IBITEKEREZO

  • Andika hano igitekerezo cyawe