Musanze : “Mbere kwikingiza Covid-19 byitabirwaga n’abagore bacuze none byarahindutse”

Yanditswe: 20-01-2022

Bamwe mu bagore bo mu mujyi wa Musanze mu karere ka Musanze , barimo abatwite n’abonsa, bavuga ko bamaze gusobanukirwa n’akamaro ko kwikingiza covid 19 , none ubu bakaba basigaye babyitabira kugira ngo birinde kuyandura no kuyanduza abana babo.
Umwe mu bagore bari baje kwikingiriza kuri site ya Kariyeri iherereye mu mujyi wa Musanze, Ugiriwabo Rose, avuga ko impamvu yaje kwikingiza covid-19 ari uko yumvise nk’umugore akwiye kugira uruhare mu kurinda umuryango we icyorezo, mu kukirinda ngo harimo no gufata urukingo.
Agira ati’’ Numvise ngomba kwikingiza nk’umugore, ngo umubiri wanjye ugire ubwirinzi kandi nshobore no kurinda abandi’’.Yongeyeho ko yasobanuriwe ko abantu bikingije covid iyo bayirwaye bataremba kimwe n’abayirwaye batarakingiwe.
Musanganire Léoncia utuye mu murenge wa Muhoza w’akarere ka Musanze, na we wari witabiriye gahunda yo kwikingiza kuri site ya Kariyeri we ni umubyeyi ubu wonsa uruhinja rw’amezi atatu.
Yatinze gufata urukingo kuko yari afite impungenge ko ruzamugiraho ingaruka, cyangwa rukazigira k’umwana we. Ati ‘’Mbere ngitwite twumvaga ko abagore batwite n’abonsa batemerewe kwikingiza, aho rero tumaze gusobanukirwa ko nta ngaruka zihari , niyo mpamvu nanjye naje kwikingiza’’. Akomeza avuga ko urukingo yahawe ari urwa kabiri kandi nta mpungenge afite kuko n’urwo nafashe mbere nta ngaruka rwamugizeho we n’umwana we ko n’ubu rero yizera ko ntazo ari ibugire.
Umukorerabushake uhagarariye ibikorwa byo gukingira kuri site ya kariyeri Shema Salvator, avuga ko bitandukanye na mbere bagitangira gukingira , ubu ngo abagore bonsa n’abatwite, batangiye kubyumva kuko nibura 50 mu bantu 300 bakingirwa buri munsi kuri iyi site , aba ari abagore bonsa.
Agira ati’’ Mbere wasangaga abagore baza kwikingiza ari bamwe batakibyara bakuze, ariko ubu abagore bonsa rwose barimo kuza kwikingiza cyane, n’abatwite na bo baraza ku buryo bushimishije, kandi si hano gusa bakingira dufite site nyinshi hano mu mujyi hose ntawabura aho yikingiriza’’.
Urukingo rwa covid 19 ruri gutangwa hirya no hino mu mujyi wa Musanze aho bari abikingiza bari guhererwa doze ya mbere y’urukingo ndetse n’iya kabiri kuri site ya Kariyeri ,iya Muhabura ,iya Goico ndetse no muri gare
Minisiteri y’ubuzima Minisante iherutse gutangaza ko mu minsi ya vuba mu Rwanda hashobora kuzatangwa doze ya 3 y’urukingo , igihe bigaragaye ko umubiri w’uwo muntu udafite ubudahangarwa. Aba ngo ni abafite indwara zidakira ndetse n’abarengeje imyaka 60.
Kugeza ubu mu Rwanda abamaze guhabwa doze ya mbere y’inkingo za covid-19,basaga miliyoni eshanu ni mu gihe abamaze guhabwa doze zombie basaga miliyoni eshatu.
Iribanews.

IBITEKEREZO

  • Andika hano igitekerezo cyawe