Ahabanza » Umuryango » Urugo » Ibintu umukazana akora akiteranya na nyirabukwe

Ibintu umukazana akora akiteranya na nyirabukwe

Yanditswe kuwa 04-01-2017 Saa 02 : 54

Mu buzima bw’abashakanye usanga hakunze kugaragara kutumvikana hagati y’umukazana na nyirabukwe, bikaba byanagera ku rwego rwo kuzana amakimbirane mu miryango.

Nyamara uko kwangirika k’umubano wabo hari ubwo kuba kuzanywe n’amakosa yaba yakozwe n’umukazana nubwo n’umugabo we cyangwa se nyirabukwe ubwe nabo bashobora kubigiramo uruhare. Gusa ubu turavuga gusa ku makosa umukazana akora.

Kumuganiriza imyitwarire mibi y’umugabo wawe ; Ku bagore benshi uzasanga bakunda abana babo b’abahungu ku buryo wowe wamushatse aba ataguha agaciro kumurusha. Iyo wihaye rero ibyo kumubwira ibibi bye ntabwo akumva ahubwo yumva ko ari wowe utangiye kuba mubi. Gusa bishobora kuba ngombwa ko wenda aba yakoze ikosa rikomeye bikaba byagusaba ko ubibwira nyokobukwe. Icyo gihe ujye ubimubwira mu ijwi ryoroheje kandi ntubitindeho cyane ngo yumve ko wowe uri kwishyira aheza.

Kumwereka ko utishimiye uburyo abanyemo n’umuhungu we : Bijya bibaho ko nyokobukwe asa nkaho ariwe uyobora umugabo wawe ndetse akamuha umwanya munini kurusha uwo aguha. Niba ushaka gukomeza kubana neza na nyokobukwe uzirinde kumwereka ko utabyishimiye. Banza ubiganirize umugabo wawe kandi nabwo ube uzi neza ko atazajya kubibwira nyina.

Kujora imyambaro ya nyokobukwe : Niyo mwaba muri abantu bakunze gusabana cyane, ujye wirinda kuba wavuga akantu kabi kuriwe niyo waba uri guseka. Jya wirinda kuba wanyega umwambaro we ngo umutegeke uwo ari bwambare nko mu gihe mufite aho muri bujyane n’ibindi bintu bimwereka udakunda ibyo we akunda.

Kwanga ubufasha aguhaye : birashoboka ko nyokobukwe yaba atuye mu cyaro ukujyayo kumusura yaguha imitwaro utwara ukabona iri bukuvune ukayanga. Icyo gihe biramubabaza cyane ndetse bikaba byakwangiza umubano wanyu. Jya wihanga ubufasha aguhaye bwose ubwakire niyo waba ubona ko bidakwiriye.

Kumuvugisha gusa igihe umugabo wawe yamuterefonnye : Kuri ubu usanga n’abakecuru baba bafite telefoni bakaba bakeneye guhamagarwa. Jya unyuzamo uhamagare nyokobukwe aho gutegereza ko muzavugana gusa igihe umuhungu we amuhamagaye muri kumwe akamuguha.

Niba warashatse ukaba ufite amahirwe yo kuba ufite nyokobukwe, ni ingenzi ko waharanira ko mubana neza aho kumva ko mugomba kugirana amakimbirane.

Gracieuse Uwadata

Ibitekerezo byanyu

IBITEKEREZO

  • Andika hano igitekerezo cyawe