Inyama ziseye zirimo intoryi

Inyama ziseye ahanini zikoreshwa mu gutegura boulettes, sambusa n’ibindi ariko ushobora no kuziteka ku buryo uzigaburana n’umuceri, spaghetti n’ibindi. Izi nyama ziba nziza no ku bana bataramera amenyo ngo bashobore guhekenya inyama nini kandi zikabafasha mu kubaka umubiri wabo.

Dore uko wategura iryo funguro :
Ibikoresho

Intoryi umufungo muto wa 200frw
Inyama ziseye garama 500
Inyanya 3
Poivron 1
Igitunguru 1
Tungurusumu udusate 3 duseye
Amavuta ya elayo ibiyiko 3
Umunyu na poivre

Uko bikorwa

  1. Ronga intoryi uzikatemo 2
  2. Shyushya amavuta ushyiremo inyama uvange kugeza zihinduye irangi
  3. Inyama zimaze guhindura irangi ushyiramo igitunguru, tungurusumu na poivron
  4. Komeza uvange kugirango bidashirira
  5. Ibitunguru na poivron bimaze gihindura irangi ushyiramo intoryi
  6. Ongeramo inyanya
  7. Komeza uvange upfundikire ho bimare iminota 7 ku muriro muke
  8. Shyiramo umunyu na poivre
  9. Bikureho ubigabure bishyushye
  10. Bigaburane n’umuceri utogosheje cyangwa se spaghetti

Gracieuse Uwadata