Ahabanza » Umuryango » Urugo » Uburyo bwiza bwo kubana na nyokobukwe mu rugo

Uburyo bwiza bwo kubana na nyokobukwe mu rugo

Yanditswe kuwa 03-06-2018 Saa 22 : 04

Mu muco nyarwanda ndetse n’ahandi ku isi, usanga ababyeyi bageze mu za bukuru abana babo bubatse babiyegereza kugirango babashe kubitaho, Akenshi usanga iyo umubyeyi aje mu rugo hari igihe umugore n’umugabo batabyumva kimwe bigatera amakimbirane mu rugo.

Reka turebe uko umugore akwiye kwitwara kugirango abane na nyirabukwe mu mahoro :

Guca bugufi : si byiza kugaragaza cyane ko ufite ububasha mu rugo imbere ye, gerageza umwubahe nk’umuntu umenyereye iby’urugo ube wamugisha inama rimwe na rimwe.

Ugomba kumufata nka maman wawe : umubyeyi w’umugabo wawe ntugomba kumufata nk’umutwaro mu rugo, ahubwo ni byiza kumwegera mukajya muganira igihe ubonye umwanya, igihe ufite akazi ukamubaza uko yiriwe umwereka umutima mwiza igihe utashye.

Kumwubahisha abana : ni byiza ko abana bawe bamenya agaciro k’umubyeyi wabyaye papa wabo, bakamwubaha kandi bakamuba hafi igihe batari mu masomo kuko nabo bamwigiraho umuco n’ubwenge bwinshi maman wabo atabonera umwanya kandi n’umukozi atabizi.

Guha umukozi inshingano zihariye zo kumwitaho : Umukozi wo mu rugo agomba gutozwa kubaha uwo mubyeyi , akamenya ko agomba kumwubaha nk’uko yubaha nyirabuja. Agatozwa amasaha yo ku mukorera buri kintu akeneye.

Kwihangana igihe adashimye ibyo umukoreye : ni kenshi usanga abantu bakuze badakunze gushima ibintu byinshi. Bashima bike rwose n’ubwo atari bose, ariko ukwiye kwihanganira iyo myitwarire igihe uhuye nayo kuri nyokobukwe.

Kwibutsa umugabo wawe kwegera umukecuru no kumuganiriza ; abagabo usanga bahugira mu kazi igihe kinini, ni byiza ko wowe mugore ufata inshingano zo kubwira umugabo wawe ko ari byiza kwegera umukecuru byibuze umwanya muto ariko akamwereka ko kuba ari mu rugo nawe bimushimishije.

Kumugeza ahari urungano : ni byiza ko umukecuru mumufasha kugera mu misa, gusura undi mukecuru muturanye niba ahari n’ahandi ashobora guhurira n’abo bari mu kigero kimwe.

Menya ko utari umwana we ariko ko bitavuze ko akwanga : ntubabazwe n’uko rimwe na rimwe wabona yitaye ku muhungu we kuruta uko akwitayeho, ibuka ko utari umwana we ariko nanone ntibivuzeko akwanga, gusa muri kamere y’abantu, umwana we niwe yiyumvamo vuba ashobora rero kugira ibyo amukorera cyangwa amubwira atakubwiye wowe. Rero ntubihe umwanya cyane kuko niba nawe ufite umubyeyi urabizi ko hari umwihariko mugiranana. Ni byiza kubiteramo urwenya niba ubon ari ngombwa kubivugaho ariko ntibikurakaze.

Si byiza guhora dutekereza ibibi abakecuru bagaragaje gusa, ahubwo niba yavuze nabi cyangwa atishimiye ibyiza mumukorera igikwiye ni ukwihangana mukumva ko ashaje kandi hari ubwo aba yaranyuze muri byinshi bibi bituma ashobora kubaho atishimye.

Byanditswe na Violette M.
photo : google

Ibitekerezo byanyu

  • yewe mwabantu mwe ! ntako umuntu abatagize ariko biragatsindwa kugira nyokobukwe w’umurozi mukabana akabasenyera kubera gutanga ibitambo byuwo muhungu we yabona arongoye ukabigwamo n’abana akabahiga kuva hasi kuva hejuru ariko kubera Imana tukarindwa ariko ubyumve ngo birakomeye kuko abana baramusuhuza nawe ukamusuhuza umwana we ntashobora kwemera ko ari nyina ukora ibyo tuba duhuye nabyo.

  • UMUGABO IYO MUKUNDANA KANDI MWUBAHANA , MUJYA INAMA MURI TWOSE, NTA GITUMA UTAMUKUNDIRA ABE KOBONE NIYO BABA BAGOYE GUTE, MUFATANYA UMUTWARO NTUBAREMERERE MWEMBI.
    NONE YABA YARAYE AGUKUBISE KUBERA NYINA WASHYIZEMO UMUNYU URUMVA WAMUKUNDA CYA UKAMUKUNDISHA ABANDI GO. IFU NZIZA KANDI INOZE IBONEKA IYO WAKOMYE URUSYO NINGASIRE YARWO.

  • Murakoze kunama mutugiriye.
    gusa nyine kubana na nyokubukwe bisaba kwihangana kandi ukunvako ntahandi mwamushyira kuko aba arumubyeyi wumugabo wawe. Ariko barahimana we, Agatuka umukozi ashyaka ko agenda, Abana ntakubitaho ngo nanyina ntamwitaho, yarwaye utamuherekeza kwamuganga bikaba induru, nyoko yaza kugusura or arwaye akaza kurwarira kumwana akamucyurira ko aza kumukwe.
    Mbese Mwuka wera niwe ufasha umukazana akihangana bikaba byiza iyo umuhungu we amuzi rimwe na rimwe akamucyaha.
    Ariko uko byagenda kose ntabwo aribyiza kwanga uwakubyariye Umugabo.
    Nge mpitamo guceceka nkamwihorera. Ubundi nkabwira umukozi ko abantu iyo bashaje baruhanya nkabana ariko tugomba kububaha cyane.
    Maranye nawe 5 years.

  • Sha nimwivugire nyokobukwe si umuntu wo kubana nawe pe. Mumbabarire ariko nagiye experience mbi mubuzima kuburyo mba ntashaka no kwibuka ko mfite mabukwe. Uziko namugishije inama nkumubyeyi ikibazo twari dufite murugo sha aranyihorera kuva ubwo nahise muhurwa mufata nkaho atabaho.

  • Kubana na Nyokobukwe ukwanga uretse gusaba Imana umutima wo kwihangana ntakindi wakoraa

    araza akajya mubapfumu bakirirwa bamushyiramo ko wowe mugore we ufite inyatsi ko ntaterambere umuhungu we azagera ho igihe cyose muzaba muri kumwe ,akirirwa aguha uburozi Imana igakinga akaboko
    uretse amasengesho gusa naho ubundi ntaho wamushyira. njyewe anyanga butindima

  • Mu rwanda abakazana na banyirabukwe
    barazirana wagirango n’umuzimu wa
    cyera ubagendamo. ndabwira abagabo ko
    gushyira nyoko munzu imwe n’umukazana
    uba warusenye pe.

IBITEKEREZO

  • Andika hano igitekerezo cyawe